កំណាព្យ ទុក្ខខ្មែរឥលូវ បទពាក្យ ប្រាំពីរ

កំណាព្យ ទុក្ខខ្មែរឥលូវ
បទពាក្យ ប្រាំពីរ

1. ផ្ទះខ្ទមកំសត់កំនត់ហូរហែ ទាំងចំការស្រែក្រុងដែរណាមិត្ត
អ្នកក្រដេកដីអ្នកមានរួមរឹត ឆក់យកជីវិតឲ្យតែខ្លួនមាន។
2. មិនខ្វល់អ្នកណាថាមានឬក្រ ឲ្យតែខ្លួនល្អបានផុតពីស្ពាន
អ្នកក្រោយលំបាករាប់រយសែនលាន ឲ្យតែខ្លួនមានហ៊ឺហារបានហើយ។
3. មិនខ្វល់សុខទុក្ខខ្មែរទាំងនគរ សង្គមវឹកវរហែកហួរឥតស្បើយ
ក្រហើយអវិជ្ជាទៀតណាមិត្តអើយ សូមជ្រាបឲ្យហើយនេះជាទុក្ខខ្មែរ។
4. ទុក្ខគ្មានគេរាប់ទុក្ខគ្មានជំរក ទុក្ខរស់ជ្រៀតជ្រកទុក្ខខ្វះដីស្រែ
ទុក្ខខ្វះវិជ្ជាទុក្ខក្រហូរហែ ទុក្ខគ្មានគេថែព្រោះខ្វះប្រាក់ចាយ។
5. ទុក្ខនៅផ្ទះខ្ទមប្រក់ស្បូវចំការ ទុក្ខអស់ខេមរាទុក្ខមុខសប្បាយ
ទោះខ្លួនជួបទុក្ខមុខនៅពព្រាយ តែបើបរិយាយវែងឆ្ងាយណាស់មិត្ត។
6. សូមស្លេះរឿងទុក្ខត្រឹមណេះសិនចុះ សូមញាតិស្រីប្រុសបែរនាំមកគិត
រកក្បួនដោះស្រាយឲ្យបានឆ្ងាយពិត ឲ្យខ្មែររស់ជិតភាពសុខចម្រើន។
និពន្ធដោយ យី ឆេងអ៊ួ (ប៉េង)
បណ្ណារក្សខ្មែរ
ភ្នំពេញ ព្រលឹមថ្ងៃ០៤ មិនា ២០១១