ចំរៀងបទ ខ្មែររួបរួមគ្នា ចង្វាក់ប្រជាប្រិយបែបបាសាក់

លំនាំបទ ខ្មែរអើយប្រុងប្រាណ (ចង្កឹះមួយបាច់)
1. សំណាងពឹងចំណេះ ឯអ្នកប្រាជ្ញចេះលោកពឹងគម្ពីរ រុក្ខជាតិពឹងធរណី អ្នករកស៊ីពឹងជំនួញ ខ្មែរអើយចូរកុំរារួញ ៗ ខំរៀនខំជួញ អើអើយជំនួញថ្លាថ្លៃ ៗ។
2. រទេះពឹងគោ រីឯម៉ូតូពឹងសាំង អ្នកលីលោកពឹងកំលាំង អ្នកប្រាជ្ញខ្លាំងពឹងវិជ្ជា
ខ្មែរអើយខំរៀនគ្រប់គ្នាៗ ខំពុះខំពារ អើអើយជំនះឧបសគ្គៗ ។
3. សេចក្តីស្នេហា ឱណាលោកពឹងគ្នីគ្នា ចេះរួបរួមសាមគ្គា ផ្គុំគ្នាចេញជាកម្លាំង
ខ្មែរអើយត្រូវហ៊ានតតាំងៗ ជួយជាកម្លាំងអើអើយកសាងរដ្ឋាៗ ។
4. សំណាបយោងដី ថ្លៃអើយស្រីយោងបុរស មានចិត្តស្ម័គ្រស្មោះ កសាងគ្រួសារតែមួយ ខ្មែរអើយត្រូវខំលើកស្ទួយៗ ជាតិខ្មែរតែមួយអើអើយកសាងរួមគ្នាៗ ។
ព្រលឹមថ្ងៃទី ១២ ខែមេសា ឆ្នាំ ២០១១
( ម៉ោង ១យប់) និពន្ធដោយ យី ឆេងអ៊ួ (ប៉េង) បណ្ណារក្សខ្មែរ